Futboleando ekimenean izena emateko epea zabalik

65 urtetik gorako pertsonentzako proiektua da, Osasuna Fundazioak eta Solera Asistencial-ek antolatua

Erakunde gorritxoak eta Solera Taldeak laugarren urtez jarraian "Futboleando" proiektua garatuko dute, 65 urtetik gorako pertsonei zuzendutako doako jarduera. Parte hartu nahi dutenek izena eman dezakete gaurtik irailaren 30era arte, edo plazak agortu arte. Aurreko edizioetan izandako arrakasta handiaren ondorioz, bi erakundeek 120 plaza izango dituzte eskuragarri.
Jarduera urriaren 7an hasi eta maiatzaren 31n amaituko da, eta kirol-denboraldi baten antzeko aldizkakotasuna izango du. Entrenamenduak astero izango dira, eta erabiltzaileek Iruñeko hiru udal kiroldegiren artean aukeratu ahal izango dute. Kiroldegi horiek Udalak lagako ditu, proiektuarekin elkarlanean ari baita. Entrenamenduak egingo diren kiroldegiak Ermitagaña, Ezkaba eta Milagrosa auzoetan egongo dira. Gainera, aldizkako entrenamenduak egingo dira Taxoareko kirol-instalazioetan, eta azken festa ere bertan egingo da, jarduerari amaiera emateko.
Entrenamenduak Osasuna Klub Atletikoko teknikariek zuzenduko dituzte, eta, gainera, Osasuna Beteranoak Kirol Elkarteko kideak ere izango dira. Elkarte horretan jokalari gorritxo ohiak daude, eta anekdotak eta bizipenak partekatuko dituzte jardueran parte hartzen dutenekin. Antolatzaileek jarriko duten kamiseta gorriarekin arituko dira erabiltzaile guztiak.

Oinez jokatzen den futbolaren iraultza

Futboleando proiektuak aurreko denboraldiko esloganari eusten dio: " Oinez jokatzen den futbolaren iraultza". 65 urtetik gorako emakume eta gizonei zuzendutako kirol modalitate hau, hain zuzen ere, horixe da: futbolean oinez jokatzea. Horren bidez, bizimodu aktiboa sustatu nahi da, eta talde horretan kirola egitea sustatu, modu irisgarri eta seguruan.
Izen-emateak

Doako jarduera honetan izena eman nahi dutenek 621 197 548 telefonora deituz edo WhatsApp zenbaki berera bidaliz egin ahal izango dute. Halaber, helbide elektroniko honen bidez ere egin ahal izango da: comunicacion@soleraasistencial.es. Edonola ere, izena, abizena, telefonoa, kiroldegia eta lehentasunezko ordutegia aurkeztu beharko dira.

Egoitzak eta ordutegiak:

Milagrosa auzoa: Arrosadia Kiroldegia (Taxonar kalea z/g)
o Ostegunetan, 09:30etik 10:30era.
o Asteazkenetan 10:00etatik 11:00etara
o Ostiraletan, 12:00etatik 13:00etara

Ezkaba auzoa: Ezkaba Udal Kiroldegia (San Kristobal kalea z/g)
o Astearteetan, 11:30etik 12:30era.

Ermitagaña auzoa: J.M. Iribarren Udal Kiroldegia (Bartolomé de Carranza 5)
o Astelehenetan 10:00etatik 11:00etara